Kwa Nini Kupenda Urahisi Kunazalisha Ugumu
Watu wengi wanapenda njia rahisi. Wanataka matokeo makubwa bila kazi ngumu, mwili mzuri bila mazoezi, biashara kubwa bila hatari, elimu bila kujisumbua kusoma. Wanaenda kutafuta kila njia ya mkato, kila suluhisho la haraka, kila kitu kinachoahidi matokeo bila jasho.
Kinachoshangaza ni kwamba, ni hii hii tabia ya kutafuta urahisi ndiyo inayowafanya wabaki na maisha magumu.
Mtu asiyetaka kujisumbua kujifunza ujuzi mpya anabaki kwenye kazi ile ile isiyomlipa vizuri. Mtu asiyetaka usumbufu wa kubadilisha tabia za ulaji anaendelea kupambana na magonjwa yanayotokana na uzito. Mtu asiyetaka kuwekeza muda kwenye mahusiano anabaki na urafiki dhaifu unaomwacha peke yake wakati wa shida.